ޕްރޮފައިލް

އއ. ހިމަންދޫ ޞިއްޙީ މަރުކަޒަކީ ޤާނޫނު އަސާސީ އިން ލާޒިމްކުރާ ރާއްޖޭގެ ރައްޔިތުންނަށް ފޯރުކޮށްދެވޭ އަސާސީ ޚިދުމަތް ތަކުގެތެރެއިން ޞިއްޙީ ފަރުވާ ފޯރުކޮށް ދިނުމަށްޓަކައި ދިވެހި ސަރުކާރުން ހިންގަވަމުންގެންދަވާ އަތޮޅުތަކުގައި ޞިއްޙީޚިދުމަތްދޭ ތަންތަން އިމާރާތް ކުރުމުގެ ޕްރޮގްރާމްގެ ދަށުން ހުޅުވުނު މަރުކަޒެކެވެ. އެގޮތުން 6 ޖެނުއަރީ 1982 އިން ފެށިގެން ހިމަންދޫ ރަށުއޮފީހުގައި ފެމެލީ ހެލްތް ޝެކްޝަނެއް އުފައްދައި އާދައިގެ ގޮތެއްގައި އަސާސީ ސިއްޙީ ހިދުމަތްތައް ދެވެންފެށުނެވެ. އަދި 08 ޖެނުއަރީ 1997 ގައި މިދެންނެވި ފެމެލީ ހެލްތު ސެކްޝަން ވަކިން އިމާރާތެއްގެ ގޮތުގައި ހެލްތް ޕޯސްޓަކަށް ބަދަލުވެ އާއިލާގެ އެހީތެރިޔަކާއި ދެ ފޫޅުމާއިންނާއެކު ވަކިއިމާރާތެއްގައި އަސާސީ ޞިއްޙީ ޚިދުމަތް ދޭންފެށުނެވެ.

އަދި 22 މާރޗް 2004 ގައި ސަރުކާރުން ހިމަންދޫ ހެލްތު ޕޯސްޓު މިހާރުގެ އޮނިގަނޑުން ނަމަ ޞިއްޙީ މަރުކަޒު ލެވެލް 1 އަށް ބަދަލުކޮށްދެއްވިއެވެ. ސިއްޙީމަރުކަޒު ހުޅުއްވައިދެއްވީ އޭރުގެ އަތޮޅު އޮފީހުގެ އެހީތެރިޔާ އަލްފާޟިލް އަލީ އަބްދުއްރަޙުމާން (ކެނެރީގެ / އއ. ހިމަންދޫ) އެވެ. އަދި ޞިއްޙީ މަރުކަޒުގެ އިމާރާތަކީ އެތައް އަހަރެއްވެ، ފާރުތަކާއި، ފުރާޅާއި، އެހެނިހެން ތަންތަން ވަރަށް ބޮޑަށް ބާވެ ހަލާކުވެފައިވާ ތަނަކަށްވާތީ 2016 ވަނަ އަހަރު އާޞިއްޙީ މަރުކަޒެއް ގާއިމްކޮށް 15 ޖަނަވަރީ 2017 ގައި އާ ޞިއްޙީ މަރުކަޒު ހުޅުވައި ޚިދުމަތް ދޭންފެށުނެވެ. އާޞިއްޙީ މަރުކަޒު ހުޅުއްވައިދެއްވީ އޭރުގެ ހެލްތު މިނިސްޓްރ އަލްފާޟިލް އަޙުމަދު ނާޒިމްއެވެ.